TobiTsang 發表於 2011-12-11
用後感終於感覺到秋冬真係黎到，天氣變得乾燥，特別要注意補水保濕。最快提升肌膚水份當然係敷保濕面膜！最近兔比一口氣試用左開架品牌Barrier Repair高滲透性滋潤補濕面膜系列其中兩款面膜。
成個系列包括極緻骨膠原彈力面膜、三重補濕滑肌面膜(水潤)同三重補濕彈力面膜(極潤)，秋冬關係兔比特別試左三重補濕滑肌面膜(水潤)同三重補濕彈力面膜(極潤)。
可愛BB包裝大家都絕唔陌生吧~ 兩款乍看似乎無分別，水潤係白色底色，而極潤包裝係粉紅底色，左上角都會有唔同顏色label標示。
Barrier Repair高滲透性滋潤補濕面膜性質溫和，無香料、添加色素同防腐劑，通過皮膚過敏測試，敏感皮膚都可以放心用。兩款補濕面膜同樣含高滲透性透明質酸，份子大小係一般透明質酸1/100，較有效直達肌膚角質低層，令美容液從深層開始補濕，大大改善肌膚缺水問題。特有同胎兒皮脂相近嘅保水成分，由水解卵燐脂(lecithin hydroxide)成分組成，提升肌膚鎖水力，持久補濕，怪唔得要用BB做產品包裝，果然有意思~
兩款面膜剪裁係一樣，分別在於美容液成份同分量。水潤美容液份量已經有22ml，極潤美容液份量仲有27ml咁多，份量十足！敷5-10分鐘（特別感到乾燥時15-20分鐘）撕走面膜，將殘留肌膚上美容液以按摩吸收，無需過水
面膜滲滿美容液，取出個時仲有精華滴出，不過敷上面並唔會滴流~
切合亞洲女性臉部輪廓大小，唔會覆蓋到髮際，唔易脫落。雖然面膜紙彈性不足，但可以非常貼服響面上，多得佢立體剪裁非常貼心，人中同下巴位有切口可以撕開，只要調整好位置將切口位交疊，無論面型大定細都可以fit到，而且兼顧埋眼位連眼膜都可以慳埋，抵讚！
兔比先連續兩日敷上水潤面膜，美容液不算黏稠，吸收蠻唔錯，提升水潤透亮感又收到毛孔，不過宜家乾燥天氣略嫌保濕度未夠持久，翌日已打回原型
接住兩日都敷上極潤面膜，美容液明顯比較多，多到面膜都吸唔晒（多餘分量可以搽一下手腳，唔好浪費呀！），而且敷完塊面膜仲好濕潤。試過有次兔比敷住面膜閉目養神，本來較左計時，但太攰OFF左繼續敷住訓著左近30分鐘，還好面膜仲好濕，可見美容液絕對唔少（當然大家唔好敷多過20分鐘啦！）
敷完固然水嫩又透亮，而且咁乾嘅日子第二日都仲維持到，肌膚飽滿有光澤，摸上去嫩嫩滑滑~ WAKAKA
價錢$69 / 5塊以開架面膜黎講唔算特別平，但絕對唔係雷野，要列入回購名單一員囉~
