我發覺有兩種產品消耗得好快, 所以永遠都唔會嫌多。第一係洗面, 第二就係卸妝。因為用得快, 所以要不停發掘更多平靚正好物, 用得多用得快都唔會心痛嘛! 今次要介紹來自日本既Bifesta卸妝系列, 呢個絕對係超級好物。就咁講Bifesta可能好多人都唔識, 但其實佢既前身就係大受歡迎既Mandom卸妝水喇! 係日本cosme仲攞過好多大獎呢!
試用產品包括(由左至右)速效卸妝潔膚水(清爽型)、全效保濕卸妝液同高效眼部卸妝液。為左測試佢地既卸妝力, 我搵左化妝袋入面最強既Maybelline眼線膠黎做示範!!
首先講下速效卸妝潔膚水(清爽型), 同系列仲有緊緻型(橙色)同亮白型(藍色), 不過相信效果都係大同小異, 按自己需要而選擇吧!
Bifesta既卸妝水係不含油份, 無香料, 無防腐劑, 通過皮膚過敏測試, 絕對可以媲美大牌子, 價錢仲要平好多好多呢! 來測試一下佢既卸妝力
雖然佢唔係專門卸眼妝, 但其實卸妝力都唔弱啊! 起碼真係抹得甩, 反覆抹多幾次下都卸到九成。呢隻卸妝水標榜卸妝同時護膚, 卸完妝唔需要再洗面。我覺得用後清爽又保濕, 感覺好舒服! 如果平時只係化淡妝, 或者鍾意用卸妝水既, 呢一隻非常OK!
之後就係全效保濕卸妝液
未試之前我以為佢同上面隻卸妝水差唔多, 唔明點解要出多支。但試過之後先發現完來係兩樣野黎! 呢隻卸妝液係比較杰身既liquid, 有油份, 卸妝力超強, 可以參考以下測試
睇到眼線一遇到卸妝液就輕易溶解嗎? 其實我個用法唔正確, 唔洗用棉, 平時卸妝只需要乾手將卸妝液係面上按摩就可以, 佢卸妝力超強, 懶人必備啊! 不過卸眼時會有少少眼朦, 要注意呀!
最後就係高效眼部卸妝液
佢係半水半油既卸妝液, 係專門卸除防水眼妝既產品。大家都知道呢種水油分離既設計好容易就可以卸到防水眼妝, 所以都唔洗我多費唇舌去介紹
真係卸得又快又乾淨, 價錢只係$48/145ml, 仲要日本製, 大抵了吧!!
我 自己一向偏愛用卸妝油, 又唔鍾意用化妝棉, 所以全效保濕卸妝液就最岩我。需然用完要再洗面, 但對我冇乜影響, 因為我每次卸完妝都一定要再用洗面膏再洗面的。而速效卸妝潔膚水就岩平時好怕油笠笠既人, 而且一take過唔洗過水, 懶人至愛! 如果化左眼妝就可以配合埋高效眼部卸妝液一齊用, 咁就確保卸得乾淨啦。呢個Bifesta卸妝系列價錢超抵, 而且大部份地方都買得到, 高度推介!!!
BmalCheung 發表於 2012-02-02
用後感